کمپیوٹر کی بورڈ میں کئی دہائیوں بعد ایک نئے بٹن کا اضافہ ۔۔

یہ بٹن کی بورڈ میں کہاں موجود ہوگا؟

گذشتہ کئی دہائیوں سے ہم کمپیوٹر اور لیپ ٹاپ میں ایک ہی طرح کے کی بورڈ کا استعمال کر رہے ہیں جن میں آج تک بٹن میں تبدیلی دیکھنے میں نہیں آئی مگر اب آپ کو نیا کی بورڈ دیکھنے کو ملے گا۔

کئی دہائیوں بعد پہلی بار مائیکرو سافٹ کی جانب سے کمپیوٹر کی بورڈ میں تبدیلی کی جا رہی ہے۔

مائیکرو سافٹ آرٹی فیشل انٹیلی جنس (اے آئی) ٹیکنالوجی کو بہتر بنانے کے لیے کوشاں ہے اور یہ کمپنی 2024 میں کمپیوٹرز کو اے آئی سے بھر دینا چاہتی ہے۔

آئندہ چند ماہ میں اگر آپ نئے ونڈوز کمپیوٹر یا لیپ ٹاپس خریدیں گے تو کی بورڈ پر ایک نیا بٹن موجود ہوگا جس کو کو پائلٹ کی (Copilot key) کا نام دیا گیا ہے۔

اسے کو پائلٹ کی (Copilot key) کا نام دیا گیا ہے جس پر کلک کرکے مائیکرو سافٹ کے اے آئی کو پائلٹ پروگرام تک رسائی حاصل ہوگی۔

کمپنی کی جانب سے جاری بیان کے مطابق لگ بھگ 30 سال قبل ہم نے کمپیوٹر کی بورڈ میں ونڈوز بٹن متعارف کرایا تھا اور دنیا بھر میں لوگوں نے اس کا استعمال کیا۔

جاری کردہ بیان میں کہا گیا کہ اب کو پائلٹ بٹن کے ذریعے صارفین اے آئی کی دنیا میں داخل ہوسکیں گے۔مذکورہ بٹن بیشتر کی بورڈز کے دائیں جانب کے alt بٹن کے برابر میں نظر آئے گا۔

اس بٹن کو کلک کرنے سے ونڈوز 11 میں ونڈوز کو پائلٹ ڈیجیٹل اسسٹنٹ لانچ ہو جائے گا جو چیٹ جی پی ٹی جیسا چیٹ بوٹ ہے۔